Ons “Kraaines” basuin kwartaalliks al die nuus – (en skindernuus!) uit. Met 'n flinke redakteur en 'n borrelende redaksie kook ons koerant behoorlik. Ons het groot planne vir 2012. Ons vrywillige borge, Mnre Hennie Briel van Wyk Nel Grondverskuiwings, en Mnr. Willie Venter van Old Mutual het reeds vir ons redaksie hempies geborg. Met ons koerant moedig ons joernalistieke vaardighede aan en verbeter ons voornemende verslaggewers se kreatiewe skryfvermoë.

Ons bied ook adverteerders die geleentheid om hul besighede bekend te stel aan die publiek, dus leer ons redaksie vroeg reeds ook die kuns van werwing en bemarking. Fotograwe kry ook blootstelling. In kort: ons wil 'n “cool” koerant uitgee wat selfs 'n prys in BEELD se skoolkoerantkompetisie kan wen!